Македонскиот спорт испиша нова значајна страница на меѓународната сцена. Претседателката на Федерацијата на училишен спорт на Македонија, Елена Мицковска, е избрана за член на Извршниот одбор на Светската федерација на училишен спорт (ISF), со што Македонија за првпат во својата историја добива претставник во највисокиот орган на управување на оваа светска спортска организација.
Изборот беше извршен на Генералното изборно собрание на ISF, кое се одржува во Белград, во присуство на претставници од земјите членки од целиот свет.
Во рамки на изборниот процес, Мицковска ја претстави својата програма, визија, мисија и стратешки цели за идниот развој на училишниот спорт. Нејзината посветеност и концепт за унапредување на спортот кај младите беа препознаени од земјите членки, како и од реизбраниот претседател на ISF, Жељко Танасковиќ, по што доби доверба во следните четири години да биде дел од највисокото раководно тело на Светската федерација.
Од преземањето на функцијата претседател на Федерацијата на училишен спорт на Македонија, Мицковска континуирано работи на развојот на училишниот спорт преку зголемено учество на македонските ученици на меѓународни натпревари, реализација на нови проекти и имплементација на современи светски стандарди во оваа област.
Во изминатиот период Македонија се етаблираше како сериозен партнер на Светската федерација на училишен спорт, а најголема потврда за тоа беше успешната организација на Светското училишно првенство во ракомет, кое се одржа во нашата земја и доби високи оценки од сите учесници и претставници на ISF.
Во своето обраќање пред делегатите, Мицковска нагласи дека Македонија силно верува во моќта на спортот како двигател за правилен развој на младите генерации. Таа ја истакна и институционалната поддршка што ја добија големите спортски проекти во земјава, меѓу кои Светското училишно првенство во ракомет и Плазма Спортските игри за млади, зад кои застанаа претседателката на Република Македонија Гордана Сиљановска-Давкова, премиерот Христијан Мицкоски и министерот за спорт Борко Ристовски.
Изборот на Елена Мицковска во Извршниот одбор на ISF претставува историско достигнување за Македонија и значајно признание за македонскиот училишен спорт, отворајќи нови можности нашата држава уште поактивно да учествува во креирањето на политиките и развојот на училишниот спорт на светско ниво.
