Македонската ватерполо репрезентација до 16 години претрпе убедлив пораз од селекцијата на Унгарија со 41:0 на турнирот „Балкан Ватерполо Гејмс 2026“.
Иако резултатот е тежок, настапот на младите македонски ватерполисти има далеку поголемо значење од самиот исход. По долгогодишна пауза, Македонија повторно има младинска ватерполо репрезентација која ги прави првите чекори кон враќање на европската сцена.
Оваа генерација претставува темел за иднината на македонското ватерполо и доказ дека спортот повторно оживува во нашата земја. Настапите против силни репрезентации се драгоцено искуство за младите играчи, кои допрва треба да го градат својот развој и да стекнуваат меѓународно искуство.
Од Ватерполо федерацијата порачуваат дека ова е само почеток на еден долг процес.
„Ќе продолжиме да работиме уште посилно со цел Македонија повторно да биде препознатлива на ватерполо мапата. Ќе инвестираме во младите и ќе создаваме нови генерации, чекор по чекор. Горди сме на секој репрезентативец, на стручниот штаб и на сите кои се дел од ова патување. Македонија повторно има репрезентација. Македонија има иднина во ватерполото“, порачуваат од федерацијата.
И покрај убедливиот пораз, најважната победа е повторното формирање на национална селекција, која треба да биде основа за развојот на ватерполото во Македонија во годините што следуваат.
