Машката кадетска репрезентација на Македонија го претрпе и вториот пораз на контролните натпревари во Софија, откако загуби од селекцијата на Ирска со 79:88.
Нашите кадети одиграа изедначен натпревар во најголемиот дел од средбата и беа рамноправен ривал, но Ирците одиграа подобро во последната четвртина и со подобра завршница стигнаа до победата.
Најефикасен во македонскиот тим беше капитенот Зунзуровски со 26 поени, четири асистенции и два скока. Шабани додаде 20 поени, четири скока и три асистенции, додека Коневски натпреварот го заврши со 15 поени и пет скока. По шест поени постигнаа Колевски и Бошев.
По двата контролни натпревари во Софија, репрезентацијата продолжува со завршната фаза од подготовките пред претстојните официјални настапи. Селекторот Дејан Стојановски истакна дека овие проверки биле важен показател за моменталната форма и напредокот на тимот.
„Ирска одигра со многу висок интензитет и тоа беше добро искуство за нас. Имавме проблеми во скокот, во играта “еден на еден” во одбраната и имавме премногу загубени топки.
Им дадовме шанса на сите играчи и направивме широка ротација, што и беше целта на овие натпревари. Во еден момент се вративме од негатива од десетина поени, израмнивме, но во последната четвртина противникот премина во зонска одбрана, на која сè уште не сме работеле. Затоа сметам дека ова беа две многу корисни контролни средби за нас. Сега продолжуваме во следната фаза од подготовките.“ – вели селекторот.
По одигрувањето на двете контролни средби во Софија, македонската кадетска репрезентација се враќа во Скопје, каде ќе ја одработи завршната фаза од подготовките пред настапот на Европското првенство од Дивизијата „Б“. Шампионатот ќе се одржи од 6 до 15 август, а домаќини ќе бидат Скопје и Гевгелија.
