Општина Кочани официјално станува дел од меѓународната програма „KNVB WorldCoaches – Фудбал за животни вештини“, која ја реализира Кралската холандска фудбалска федерација (KNVB) со поддршка на УЕФА. По тој повод беше одржана заедничка средба на која присуствуваше и амбасадорката на Кралството Холандија во Република Северна Македонија, Узлем Џанел.
Претседателот на Советот на Општина Кочани, Александар Андов, истакна дека станува збор за проект кој има многу поголемо значење од самиот спорт.
„Денес имав чест, како претседател на Советот на Општина Кочани, да присуствувам на заедничката средба со амбасадорката на Кралството Холандија во Република Северна Македонија, Узлем Џанел, по повод вклучувањето на Кочани во оваа значајна меѓународна програма, реализирана од Кралската холандска фудбалска федерација (KNVB) со поддршка на UEFA.
Ова не е само проект за фудбал – ова е инвестиција во нашите деца и младите. Преку спортот тие ќе развиваат самодоверба, лидерски способности, тимски дух, почитување на различностите и здрави животни навики, а локалните тренери, наставници и волонтери ќе добијат современи знаења и алатки за работа.
Особено ме радува што во период кога Кочани вложува во развојот и закрепнувањето на заедницата, стануваме дел од иницијатива што ги промовира еднаквите можности, социјалната вклученост и позитивните вредности.
Благодарност до Амбасадата на Кралството Холандија, KNVB, UEFA и локалниот партнер ТАКТ за довербата и поддршката. Заедно создаваме подобри можности за идните генерации“, изјави Андов.
Програмата „KNVB WorldCoaches“ има за цел преку фудбалот да придонесе за личниот развој на младите, промовирајќи вредности како тимска работа, почит, еднаквост, лидерство и здрав начин на живот, додека тренерите и едукаторите ќе добијат современи методи и алатки за работа со младите генерации.
