Ракометното дерби помеѓу Еурофарм Пелистер и Вардар ќе се одигра оваа сабота во салата „Боро Чурлевски“ во Битола, а салата беше распродадена за само седум минути. На големото дерби во битолската сала ќе биде присутни двете навивачки групи „Чкембари“ и „Комити“, а салата ќе биде исполнета до последното седиште.
Продажбата на билетите започна точно на пладне, а само седум минути подоцна сите карти беа продадени. Онлајн продажбта придонесе за рекордно време да се продадат билетите.
Дополнително ракометното дерби ќе има хуман карактер, за што информира шампионот.
„РК Еурофарм Пелистер испраќа хумана порака на последниот домашен натпревар во 2024 година. Ги повикуваме сите наши навивачи, симпатизери, приврзаници на полувремето од натпреварот против Вардар 1961 (сабота, 14 декември -18.00 часот) на теренот да фрлат плишани играчки наменети за дечињата од ранливите категории. Со оваа порака сакаме да ги потенцираме вистинските вредности на животот, пренесени преку спортот“, се вели во соопштението на Еурофарм Пелистер.
Натпреварот ќе се игра во сабота, со почеток од 18:00 часот.
