Пелистер ги задржа носителите – Ристевски, Спировски, Мрмачовски и Димовски продолжуваат во зелено-белиот дрес

Пелистер Битола продолжува со формирањето на тимот за новата сезона, а клубот официјално потврди дека четворица фудбалери ќе ја продолжат соработката со битолскиот состав.

Нов договор со Пелистер потпишаа Кире Ристевски и Стефан Спировски, кои со своето големо искуство треба да имаат значајна улога во тимот во новата натпреварувачка сезона.

Покрај нив, верност кон зелено-белите бои продолжија и младите фудбалери Јован Мрмачовски и Натаниел Димовски, кои во клубот ги гледаат како дел од иднината и генерацијата на која сериозно се смета во периодот што следува.

Сите четворица потпишаа договори со важност од една сезона и ќе бидат дел од тимот кој ќе ја има главната цел – враќање на Пелистер во Првата македонска фудбалска лига.

Раководството на клубот во овој период активно работи на комплетирање на играчкиот кадар и создавање конкурентен состав кој ќе одговори на амбициите во новата сезона.

Официјалниот старт на подготовките е закажан за четврток, кога новиот шеф на стручниот штаб Борче Христов ќе ја одржи првата прозивка и ќе го означи почетокот на подготовките за новиот предизвик.