ГРК Охрид ја обезбеди иднината со еден од хероите заслужни за европската титула. Имено, јапонскиот среден бек- Косуке Јасухира повторно ќе го облече дресот на „гладијаторите“, откако клубот постигна договор за негово враќање од сезоната 2027/28.
Иако охридскиот клуб вложи максимални напори Јасухира да остане и ова лето, тоа не беше возможно поради неговиот важечки договор со Бурган од Кувајт, кој трае до 2027 година. По неговото истекување, Јапонецот ќе се врати крај Охридското Езеро и ќе остане најмалку до 2029 година.
Јасухира беше еден од клучните играчи во историскиот поход на Охрид до трофејот во ЕХФ Европскиот Куп, па неговото враќање претставува значајна вест за клубот и навивачите.
„Среќен сум што само по една сезона ќе се вратам во клубот со кој го освоив првиот европски трофеј. Рибари и охриѓани, се гледаме за кратко и заедно ќе атакуваме по уште многу титули“- изјави Јасухира.
Во меѓувреме, Охрид продолжува со подготовките за новата сезона. Во тимот веќе пристигнаа седум нови имиња – Доминик Мате, Мартин Ивановски, Мартин Карапалевски, Никола Зечевиќ, Шуичи Јошида, Дино Славиќ и Адама Кеита, а клубот сè уште го очекува и одговорот од ЕХФ за апликацијата за вајлд-карта за настап во Лигата на Европа. Доколку не добие место во тоа натпреварување, Охрид повторно ќе настапува во ЕХФ Европскиот Куп.
