Еден од најдобрите македонски кошаркари во поновата историја, Предраг Самарџиски, започна ново поглавје во својата кариера. Поранешниот репрезентативец се приклучи на стручниот штаб на младинската репрезентација на Македонија У20 , која ги продолжува подготовките за Европското првенство од Дивизијата „Б“.
Македонските надежи од 10 до 19 јули ќе настапат на шампионатот во Братислава, а Самарџиски од вчера официјално е дел од стручниот тим кој ќе работи со младите кошаркари.
По завршувањето на успешната играчка кариера во 2023 година, Самарџиски реши да се посвети на тренерската професија. Во изминатиот период работеше во Кина, каде стекна драгоцено искуство, а сега повторно е дел од македонската кошарка.
Неговото богато репрезентативно и клупско искуство ќе биде од голема корист за младинската селекција, која ќе се обиде да остави добар впечаток на Европското првенство. Како член на генерацијата што го оствари најголемиот успех во историјата на македонската кошарка, Самарџиски сега ќе има можност своето знаење и искуство да го пренесе на новите таленти.
Со неговото доаѓање, стручниот штаб добива уште едно звучно име кое ќе помогне во развојот на младите кошаркари и нивната подготовка за европскиот предизвик.
