Второлигашот Беласица продолжува активно да го засилува играчкиот кадар во пресрет на новата натпреварувачка сезона. Струмичани денеска ги претставија Димитриј Димитриевски и Лука Варошановски како нови фудбалери на тимот.
Димитриевски пристигнува од редовите на Охрид Лихнидос и важи за универзален офанзивен фудбалер кој може да покрие повеќе позиции во средниот ред и нападот. Од клубот очекуваат неговото искуство и квалитет да донесат дополнителна креативност и свежина во играта на Беласица.
Другото ново име во тимот е и Лука Варошановски, кој доаѓа од Кожуф. Станува збор за млад и перспективен фудбалер кој настапува во средниот ред, а по потреба може да игра и како централен дефанзивец. Варошановски е и репрезентативец на Македонија до 19 години, што дополнително говори за неговиот потенцијал.
Со овие две засилувања Беласица продолжува да го комплетира ростерот, со јасна цел да биде конкурентна во новата сезона и да оствари што подобри резултати во Втората македонска фудбалска лига.
