Еден од најталентираните македонски ракометари, Димитар Узунчев, и официјално е нов член на словенечкиот шампион Целје Пивоварна Лашко, откако потпиша договор до 2028 година, со можност соработката да биде продолжена за уште една сезона.
Дваесетгодишниот десен бек пристигнува во еден од најреномираните европски клубови за развој на млади ракометари, каде ќе го засили составот по повредата на Мај Маргуч. Во новата сезона ќе ја дели позицијата на десен бек со искусниот Жига Млакар, а во Целје ќе го носи дресот со број 10.
Од словенечкиот шампион истакнуваат дека Узунчев е еден од најголемите таленти во македонскиот ракомет, што го потврдува и признанието за најдобар млад играч во македонското првенство. Во клубот веруваат дека неговата брза и експлозивна игра совршено ќе се вклопи во препознатливиот стил на Целје.
Во изминатата сезона Узунчев како позајмен ракометар од Алкалоид настапуваше за Бутел Скопје, каде беше еден од најдобрите играчи на тимот. На 31 натпревар постигна 134 голови, со што го привлече вниманието на повеќе странски клубови, а кариерата ќе ја продолжи во словенечкиот шампион, кој следната сезона ќе настапува и во Лигата на шампионите.
Македонскиот репрезентативец потекнува од ракометната школа на Партизан Гевгелија, а низ својата кариера беше дел од сите помлади репрезентативни селекции на Македонија. На Светското младинско првенство во 2025 година беше меѓу најдобрите стрелци на турнирот, завршувајќи во ТОП 10 со 49 голови од 71 обид.
Главниот тренер на Целје, Клемен Лужар, објасни дека клубот барал решение по повредата на Маргуч и дека изборот паднал токму на македонскиот репрезентативец.
„Со оглед на тоа што Мај Маргуч ќе биде отсутен подолг период, баравме решение за неговата позиција. И понатаму сакаме да ја следиме нашата филозофија, која се темели на млади таленти и брза игра. Убедени сме дека Димитар може да ја пополни таа празнина. Тој е сличен тип на играч како Мај и во штотуку завршената сезона беше еден од најдобрите млади играчи во силната македонска лига. Беше член на сите помлади репрезентации, па има и меѓународно искуство. Ова сигурно ќе биде голем чекор напред и за него и ми е драго што се одлучи за Целје“, изјави Лужар.AC
По официјалната промоција, своите први впечатоци ги сподели и Узунчев.
„За мене трансферот во РК Целје Пивоварна Лашко е голем чекор во кариерата и пред сè голема чест. Целје е клуб со богата традиција, кој одлично развива млади играчи. Среќен сум што ќе бидам дел од оваа приказна. Настапите во Лигата на шампионите се остварување на мојот ракометен сон и сигурен сум дека тоа дополнително ќе ми помогне да напредувам како играч. Ќе го дадам својот максимум за да ја оправдам довербата и да му помогнам на тимот да оствари што подобри резултати.“
Во Целје не ја криеја радоста од ангажманот на младиот Македонец, за кого велат дека е исклучително борбен и посветен ракометар, а на Узунчев му посакаа многу голови и успешни настапи во сино-жолтиот дрес.
