Третолигашот Ржаничино сериозно ги најавува своите амбиции за претстојната сезона во Третата лига, а раководството на клубот веќе започна со формирање на тим кој ќе има задача да се бори за самиот врв на табелата.
Клубот најавува создавање на вистински „дрим-тим“, а во изминатиот период беа потврдени неколку значајни имиња кои треба да бидат носители на играта во новата сезона.
Најголемо засилување во нападот претставува ангажманот на искусниот Стефан Богдановски. Станува збор за фудбалер со богато искуство, кој во својата кариера настапуваше за екипите на Тетекс, Скопје, Работнички и Борец, а интернационално искуство стекнуваше и во словачките Трнава и Серед. Од Ржаничино очекуваат неговите голгетерски квалитети да бидат клучен фактор во борбата за висок пласман.
Покрај новото засилување, клубот успеа да го задржи и капитенот Иван Мицевски, кој и во новата сезона ќе го носи дресот на Ржаничино. Искусниот дефанзивец важи за еден од лидерите на тимот и столб на одбраната, а неговото останување претставува голем плус за амбициозниот проект на Ржаничино.
Дополнителна сила на крилните позиции ќе биде Огнен Здравковски, офанзивец со прволигашко педигре, кој го продолжи договорот со клубот. Здравковски е дете на Вардар, а во својата кариера има настапувано и во Првата македонска фудбалска лига, како и во Втората лига во дресот на Беласица. Неговата брзина, дриблинг и офанзивна креативност треба да донесат дополнителен квалитет во играта на Ржаничино.
Со ангажманот на Стефан Богдановски, задржувањето на капитенот Иван Мицевски и продолжувањето на соработката со Огнен Здравковски, Ржаничино јасно испраќа порака дека во новата сезона ќе атакува на самиот врв во Третата лига.
Во клубот не кријат дека целите се високи, а навивачите со нетрпение очекуваат нови победи и продолжување на позитивната приказна на Ржаничино.
