Младиот фудбалер Валентино Васев од Радовиш, роден 2017 година, продолжува да го привлекува вниманието со својот талент и љубов кон фудбалот. Младиот фудбалер на ФК Азури од Радовиш зад себе има исклучително успешен период, исполнет со нови искуства и значајни признанија.
Почетокот на месец јуни за Васев беше особено успешен. Тој настапи на меѓународен турнир во Охрид, каде со своите игри остави одличен впечаток. По успешните настапи на турнирот следуваше нова голема можност – еднонеделни тренинзи во редовите на еден од најголемите бугарски клубови, Левски Софија.
За време на престојот во бугарската престолнина, младиот радовишанец тренираше со академијата на Левски Софија, стекнувајќи драгоцено искуство работејќи со професионални тренери и учествувајќи на четиридневен турнир.
По враќањето од Софија, Васев беше дел и од кампот на белградска Црвена Звезда, кој се одржа во Скопје. По девет интензивни тренинзи и натпревари, талентираниот фудбалер беше избран за најдобар играч на кампот, што претставува уште едно големо признание за неговиот талент и посветеност.
Како награда за одличните настапи, Валентино доби покана во август да тренира во Белград, во академијата на неговиот омилен клуб – Црвена Звезда, каде одблиску ќе ја почувствува магијата на професионалниот фудбал.
Интересно е што идолот на младиот Васев е португалската суперѕвезда Кристијано Роналдо, додека покрај Црвена Звезда, тој навива и за италијанскиот гигант Јувентус. Кога станува збор за репрезентативен фудбал, негова омилена селекција е Португалија.
Младиот фудбалер истакнува дека учеството на вакви кампови и работата со професионални тренери му помагаат значително да напредува.
„Тренинзите со висок интензитет и работата со професионални тренери ми овозможуваат постојано да учам нови работи. Верувам дека ќе продолжам да напредувам и ќе бидам сè подобар и подобар“, вели Васев.
Со оглед на неговата посветеност, талент и желба за напредок, пред Валентино Васев сигурно претстојат уште многу убави фудбалски приказни, а радовишкиот спорт добива уште еден млад бисер кој ветува светла иднина.
