Љубителите на малиот фудбал и ова лето ќе имаат можност да уживаат во возбудувањата на традиционалниот Меморијален турнир „Влатко Петров“, кој по 26. пат ќе се одржи во штипската населба Чардаклија.
Организаторите официјално го отворија процесот за пријавување на екипите, а заинтересираните состави ќе можат да се пријавуваат до 11 јули. И годинава турнирот ќе понуди богат награден фонд во вкупна вредност од 350.000 денари, што го вбројува меѓу најатрактивните турнири во мал фудбал во Македонија.
Победничката екипа ќе инкасира 180.000 денари, второпласираниот тим ќе добие 100.000 денари, третото место носи награда од 50.000 денари, додека четвртопласираната екипа ќе освои 10.000 денари.
Турнирот ќе се игра на терен со димензии 40х20 метри со тартан подлога, а натпреварите ќе се играат по систем 4+1 со професионална футсал топка. Секоја екипа ќе може да пријави најмногу 10 фудбалери, со можност во елиминациската фаза бесплатно да ангажира уште двајца т.н. „џокер“ играчи.
Организаторите информираат дека бројот на учесници е ограничен на 24 екипи, додека шемата на вкрстување ќе биде одредена во зависност од бројот на пријавените тимови и ќе биде дефинирана во официјалниот правилник на турнирот. Почетокот на турнирот исто така ќе биде утврден дополнително, во зависност од бројот на пријавени екипи, за што сите учесници ќе бидат навремено информирани.
Од Организацискиот одбор упатија повик до сите спортисти, рекреативци и љубители на малиот фудбал од целата држава да бидат дел од оваа спортска манифестација, истакнувајќи дека и покрај современите предизвици остануваат доследни на ставот дека спортот и рекреацијата треба да бидат достапни за секого.
„Горди на големата традиција и водени од мотото ‘спортот е она што нè обединува’, ги повикуваме сите заинтересирани екипи да се пријават и да бидат дел од една од ретките спортски манифестации од ваков тип кои сè уште опстојуваат“, порачуваат организаторите.
Спортска Мрежа и оваа година ќе биде медиумски партнер на Меморијалниот турнир „Влатко Петров“, со што успешната соработка продолжува петта година по ред, откако започна уште во 2022 година.
Сите заинтересирани екипи своето учество можат да го пријават на телефонските броеви: 075-206-494, 078-206-173 и 078-355-978.
