Спортска Мрежа ексклузивно дознава како ќе изгледаат шест региони во Третата македонска фудбалска лига.
Од следната сезона се воведува шести регион во Трета лига, односно еден повеќе во однос на ланската сезона кога беа пет региони.
Според тоа беа направени корекции во веќе постоечките региони.
Регионална Трета фудбалска лига 1 ќе биде на територија на општините Аеродром, Арачиново, Бутел, Гази Баба, Ѓорче Петров, Карпош, Кисела Вода, Илинден, Зелениково, Петровец, Сопиште, Студеничани, Сарај, Центар, Чаир, Чучер Сандево и Шуто Оризари.
Регионална Трета фудбалска лига 2 ќе гравитира на територија на Брвеница, Боговиње, Врапчиште, Дебар, Јегуновце, Желино, Маврово-Ростуше, Теарце, Тетово и Центар Жупа.
Регионална Трета фудбалска лига 3 ќе биде на територија на општина Битола, Вевчани, Дебрца, Демир Хисар, Кичево, Македонски Брод, Могила, Новаци, Пласница, Охрид, Ресен и Струга.
Регионална Трета фудбалска лига 4 ќе биде на териториите на општините Велес, Градско, Демир Капија, Долнени, Кавадарци, Кривогаштани, Крушево, Неготино, Прилеп, Росоман и Чашка.
Најголем регион ќе има Регионалната Трета фудбалска лига 4 која ќе се протега на териториите на општините Берово, Богданци, Босилово, Василево, Валандово, Виница, Гевгелија, Делчево, Дојран, Зрновци, Карбинци, Кочани, Карбинци, Конче, Македонска Каменица, Ново Село, Пехчево, Пробиштип, Радовиш, Струмица, Чешиново-Облешево и Штип.
Регионалната Трета фудбалска лига 6 ќе биде на територија на општините Куманово, Кратово, Крива Паланка, Липково, Лозово, Ранковце, Свети Николе и Старо Нагоричане.
Дебар кој територијално припаѓаше во Трета лига – Југозапад во минатата сезона, сега ќе биде дел од Трета лига – Запад, а пак Кичево од западниот регион ќе оди во Југозападниот регион.
Свети Николе од Источниот регион ќе оди во Северниот регион. Најголем регион ќе биде Источниот, а најмал северниот.
Шампионите на овие шест региони ќе играат бараж меѓусебно, а победниците ќе бидат нови членови на Втора лига. Од второлигашката конкуренција ќе испаднат последните три екипи директно во Регионалните Трети лиги.
