Шампионот КМФ Проект го претстави своето ново засилување за следната сезона, откако клубот од Јосифово стави потпис со Александар Коцев.
Се работи за големо и квалитетно засилување, 23-годишниот фудбалер во својата кариера има настапувано за Беласица од Струмица, каде има повеќе од 150 натпревари, а претходно беше дел и од АП Брера Струмица.
Како футсалер настапуваше и за Црна Река од Кавадарци, а последно градеше меѓународна кариера во Швајцарија.
„Александар Коцев е играч кој доаѓа со квалитет, искуство, карактер и победнички менталитет, подготвен да ги прифати предизвиците кои нè очекуваат на домашната и европската сцена. Веруваме дека неговата енергија, посветеност и желба за напредок ќе бидат значаен дел од нашите амбиции во сезоната што следува“, велат од КМФ Проект.
Македонскиот шампион го гради ростерот за новата сезона во која ќе атакува на одбрана на двојната круна, но се подготвува и за квалификациите за Лигата на шампиони.
