Ракометарите на Охрид на почетокот од септември ќе имаат можност да се борат за ново одличје, откако беше потврден терминот за натпреварот од Супер Купот на Македонија.
Првиот трофеј во новата сезона ќе се доделува на 3 септември, а противник на охриѓани ќе биде актуелниот шампион Вардар. Информацијата ја соопштија од охридскиот клуб, додека дополнителни детали околу домаќинот на средбата и продажбата на билетите ќе бидат објавени во наредниот период.
Иако Вардар минатата сезона ја освои двојната круна во македонскиот ракомет, местото во Супер Купот му припадна на Охрид како финалист во Купот на Македонија. Така, охридскиот тим ќе добие уште една можност да се надигрува за трофеј и да продолжи да ја испишува својата успешна клупска приказна.
За Охрид ова ќе биде уште еден историски предизвик и шанса сезоната да ја отвори со важен и историски меч и можен нов успех.
