Женската кошаркарска репрезентација на Македонија до 17 години оствари убедлива победа над домаќинот Романија со 93:26 во последното коло од турнирот „Rising Stars“ што се одржа во Букурешт.
Избраничките на селекторот Виктор Петровски уште од самиот почеток ја наметнаа својата игра и по првата четвртина имаа висока предност од 27:8. Македонските кошаркарки продолжија во ист ритам и до полувремето ја зголемија разликата на убедливи 62:17, со што практично го решија победникот.
Посебно импресивна беше играта во последната четвртина, во која нашата селекција му дозволи на противникот да постигне само еден поен, и тоа од линијата за слободни фрлања.
Со оваа победа Македонија го заврши турнирот со учинок од две победи и еден пораз, што беше доволно за освојување на второто место во конечниот поредок.
Најефикасна во македонскиот состав беше Милосављевиќ со 13 поени и шест скока, додека Колева и Трајковска постигнаа по 11 поени. Дополнителна вредност за тимот е фактот што сите кошаркарки кои добија шанса за настап се запишаа во листата на стрелците.
Турнирот во Букурешт претставуваше уште едно успешно меѓународно искуство за младата македонска селекција, која остави одличен впечаток во текот на тридневниот престој во романската престолнина.
