Македонскиот фудбалер Ване Јованов и официјално ја продолжи соработката со унгарскиот прволигаш Нирегихаза. Клубот му укажа доверба на 27-годишниот дефанзивец и потпиша нов договор со него кој ќе важи до летото 2028 година.
Јованов во досегашниот дел од престојот во унгарскиот клуб одигра 13 натпревари и со своите настапи успеа да го убеди раководството дека заслужува да остане важен дел од тимот и во наредните сезони.
Македонскиот дефанзивец зад себе има богата кариера. Во домашниот шампионат настапуваше за Брера, Победа и Брегалница, додека интернационално искуство стекна и во хрватскиот Вараждин.
Продолжувањето на договорот претставува потврда за добрите игри на Јованов, кој и во иднина ќе ги брани боите на Нирегихаза со амбиција за нови успеси во унгарскиот фудбал.
