Струга Трим Лум продолжува да го задржува искусното јадро на тимот за новата сезона. Клубот ја продолжи соработката со искусниот играч за врска Буњамин Шабани за уште две години.
Триесет и петгодишниот фудбалер е еден од најискусните во составот на стружани и ќе продолжи да го носи дресот на актуелниот прволигаш и во наредниот период.
Во својата богата кариера Шабани настапуваше за повеќе клубови во Македонија и регионот, меѓу кои Скопје, Ренова, Шкупи, Дрита и ерменскиот Ширак. Со своето искуство, лидерски квалитети и стабилни настапи на средината од теренот, тој претставува важен дел од тимот на Струга Трим Лум.
Продолжувањето на договорот со Шабани е уште еден показател дека клубот сака да го задржи костурот на екипата и да остане конкурентен во домашните натпреварувања и во претстојните предизвици.
