Македонскиот репрезентативец и капитен на националниот тим, Филип Кузмановски, продолжува со одличните настапи на Азискиот клупски шампионат, каде повторно беше меѓу најистакнатите ракометари во составот на Кувајт Клуб.
Во последното коло од групната фаза, Кувајт Клуб беше поразен од Шарџа од Обединетите Арапски Емирати со минимални 30:29 во неизвесен натпревар кој се решаваше во самиот финиш. И покрај поразот, екипата од Кувајт успеа да го обезбеди посакуваниот пласман во полуфиналето на престижното натпреварување.
Кузмановски уште еднаш ја потврди својата голгетерска форма, постигнувајќи осум погодоци и предводејќи го својот тим во нападот. Македонецот е еден од најконстантните играчи на турнирот и важен адут на Кувајт Клуб во борбата за највисок пласман.
Во полуфиналето Кувајт Клуб ќе се соочи со саудискиот Ал-Калиџ, тим за кој настапува поранешниот ракометар на Вардар, Дмитро Хориха. Победникот од овој дуел ќе направи голем чекор кон освојување на титулата на Азија.
Финалниот натпревар е закажан за 16 јуни, а покрај шампионскиот трофеј, влогот е и пласман на ИХФ Суперглоуб – Светското клупско првенство, каде настапуваат најдобрите клубови од сите континенти.
Со формата што ја прикажува Кузмановски, Кувајт Клуб со право може да се надева на нов голем успех на азиската сцена
