Новиот прволигаш Шкендија Арачиново ја продолжи соработката со Христијан Димов и за следната натпреварувачка сезона.
26-годишниот Димов има голема верност кон тимот од Арачиново, тој е дел од Шкендија Арачиново уште кога тимот беше во Трета лига – Север, тој е дел од две златни генерации. Првата, која избори влез во Трета лига – Север во Втора лига, како и дел од втората златна генерација која избори влез од Втора во Прва лига и со тоа Димов стана дел од историјата на Шкендија Арачиново.
„Нашиот клуб со задоволство објавува дека фудбалерот Христијан Димов ќе биде дел од нас и во новата сезона. Димов несомнено е еден од најзаслужните луѓе за нашиот пат и успеси. Тој му остана верен на клубот и во најтешките денови, давајќи извонреден придонес уште од Третата лига па сè до врвот каде што се наоѓаме денес. Неговата верност, професионалност и карактер го прават пример што треба да се следи и важен столб на нашиот проект“, велат од Шкендија Арачиново.
Димов во својата кариера покрај за Шкендија Арачиново настапуваше за Куманово, Скопје, Каменица Саса, Вардар, Работнички, а интернационална кариера градеше во Интер Запресиќ од Хрватска.
