Повратникот во македонската Супер лига, РК Младост 1977 од Богданци, продолжува со формирањето на тимот за новата сезона, а клубот потврди дека еден од најважните играчи ќе остане дел од составот и во наредниот период.
Станува збор за Даниел Андоновски, кој и во сезоната што следува ќе го носи дресот на Младост. Со своите настапи, борбеност и континуитет, Андоновски беше еден од клучните играчи во тимот кој избори враќање во елитното друштво, а сезоната ја заврши како најдобар стрелец на богданчани.
Неговото останување претставува значајна вест за клубот, кој амбициозно ги подготвува настапите во Супер лигата и сака да изгради конкурентен тим способен да одговори на сите предизвици што ги носи најсилната македонска ракометна конкуренција.
Од клубот истакнуваат дека продолжувањето на соработката е уште еден важен чекор во градењето на стабилен и квалитетен тим за иднината.
„Со големо задоволство објавуваме дека Даниел Андоновски и во следната сезона ќе го носи дресот на РК Младост 1977! Борбеноста, посветеноста и квалитетот што ги покажа на теренот правејки го најдобар стрелец сезонава во нашата екипа се само дел од причините поради кои клубот и Даниел продолжуваат заедно кон нови предизвици. Неговото останување претставува уште еден важен чекор во градењето на тим кој ќе биде подготвен за сите предизвици што ги носи новата сезона во Супер лигата. Веруваме дека најдоброто допрва доаѓа и дека заедно ќе испишеме нови успешни страници во историјата на клубот“, велат од клубот.
Младост минатата сезона избори пласман во Супер лигата совладувајќи ја Струга во баражот, а раководството на клубот веќе започна со задржување на носителите на играта и засилување на ростерот.
Продолжувањето на соработката со најдобриот стрелец Даниел Андоновски е јасен показател дека амбициите на клубот од Богданци остануваат високи и во суперлигашкото друштво.
