Екипата на Огражден од Ново Село, која минатата сезона ја освои титулата во Општинската фудбалска лига (ОФЛ) Струмица и обезбеди пласман во Трета лига – Исток, го промовираше своето прво засилување за новата сезона.
Новиот член на шампионскиот состав е 28-годишниот Мартин Ѓорѓиевски, фудбалер кој може да одговори на повеќе дефанзивни позиции, настапувајќи како стопер и бек.
Ѓорѓиевски во сезоната која измина го носеше дресот на Полиспортива Самураи во Италија, а зад себе има и богато искуство на македонските терени. Во својата кариера настапуваше за Напредок од Радово, како и за поранешниот прволигаш Хоризонт Турново.
Со ангажманот на искусниот дефанзивец, Огражден испраќа јасна порака дека сериозно се подготвува за предизвиците кои го очекуваат во Трета лига – Исток.
Клубот од Ново Село минатата сезона стигна до шампионската титула во ОФЛ Струмица, се стекна со право на настап во третолигашката конкуренција. Раководството на клубот веќе започна со екипирање на тимот, а Мартин Ѓорѓиевски е првото име кое ќе го засили составот во пресрет на новата сезона.
