Македонската тениска репрезентација и Молдавија се израмнети на 1-1 по сингл мечевите, па победникот во дуелот од првото коло на Третата Европска група од Дејвис купот ќе биде решен во натпреварот во двојки.
Во вториот сингл меч, Олег Приходко беше принуден да му го предаде натпреварот на Раду Албот поради грчеви. Македонскиот тенисер одигра одличен меч, но не успеа да го приведе до крај. Средбата беше прекината во третиот сет при резултат 1-1 во сетови и 2:0 во гемови за Албот.
Приходко одлично го отвори мечот и во првиот сет имаше водство од 4:1 и 5:2 во гемови. Иако Албот успеа да се врати и да избори тај-брејк, притоа пропуштајќи три сет-топки, македонскиот тенисер остана смирен и со 10:8 го доби тај-брејкот, а со тоа и првиот сет.
Добрата игра ја продолжи и во вториот сет, каде што направи брејк за водство од 3:1. Сепак, по петтиот гем Приходко побара медицински тајм-аут поради проблеми со грчеви. Тоа се одрази на неговата игра, што Албот знаеше да го искористи и постепено ја презеде контролата. Откако израмни на 5:5, тенисерот на Молдавија освои четири последователни гема и го израмни резултатот во сетови.
Во мечот во двојки за Македонија настапуваат Калин Ивановски и Олег Приходко, додека за Молдавија играат Раду Албот и Иља Снитари.
Претходно, Калин Ивановски и донесе водство на Македонија со победата над Снитари од 2-1 во сетови (4:6, 6:3, 6:1).
