Македонската тенисерка Лина Ѓорческа не успеа да ја мине првата пречка на ИТФ фјучрс турнирот во Загреб, откако по голема борба беше поразена од Екатерина Казинова со 2-1 во сетови (1:6, 7:5, 6:4). Мечот траеше два часа и 26 минути.
Ѓорческа одлично го отвори дуелот и целосно доминираше во првиот сет, кој го доби со убедливи 6:1, поведувајќи претходно и со 5:0 во гемови.
Македонската тенисерка беше на чекор до победа и во вториот сет. При водство од 5:3 во гемови таа имаше меч-топка, но Казинова успеа да се спаси и со серија добри поени да го сврти текот на сетот, кој го доби со 7:5.
Во решавачкиот трет сет се водеше израмнета борба. Резултатот беше изедначен на 2:2 и 4:4, но во завршницата руската тенисерка успеа да направи клучен исчекор и да ја искористи третата меч-топка за конечни 6:4 и пласман во следната рунда.
