Македонската репрезентативна голманка Викторија Панчурова на само 26-годишна возраст одлучи да стави крај на својата репрезентативна кариера и вечерва во Битола го одигра последниот натпревар во дресот со државниот грб.
Македонија на домашен терен загуби од Азербејџан со 1:3 во квалификациите за Светското првенство, а овој натпревар ќе остане запаметен како последниот настап на Панчурова во националниот тим. За голманката од Струмицa тоа беше последниот „танц“ во светиот дрес, крај на едно долго и емотивно патување кое траеше цели 12 години.
По натпреварот, Панчурова со емотивна порака се прости од репрезентацијата.
„Од девојче кое во 2014 година за првпат го облече дресот на Македонија. Дванаесет години чест, гордост и неизмерна љубов кон дресот што секогаш го носев со срце. Од првиот повик до последниот натпревар, секој тренинг, секоја одбрана, секоја победа и секој тежок момент ме направија личност што сум денес. Имаше победи што ќе ги паметам засекогаш, порази од кои научив многу, солзи, насмевки, незаборавни патувања и луѓе кои станаа дел од моето секојдневие. Благодарам на секоја соиграчка, на секој тренер, на целиот стручен штаб, на моето семејство и на сите кои веруваа во мене и беа покрај мене во текот на ова патување. Дојде време за ново поглавје, но љубовта кон фудбалот и гордоста што ја чувствував секогаш кога ја преставував Македонија ќе останат засекогаш во мене“, рече Викторија Панчурова.
Во чест на нејзиниот последен настап, на стадионот во Битола беше организирана и мала свеченост. Панчурова доби дрес со бројот 1 и врамена фотографија како знак на благодарност за нејзиниот придонес во развојот и успесите на женската фудбалска репрезентација на Македонија.
Тоа беше момент исполнет со емоции, момент кој ги разбуди спомените за сите одбрани, настапи и години поминати во националниот тим.
Панчурова првпат го облече репрезентативниот дрес во 2014 година, а на клупски план во кариерата настапуваше за Истатов во периодот од февруари до јули 2013 година. Потоа застана на голот на Тиверија Брера, каде остана до ден-денес и израсна во една од најдобрите македонски голманки.
Со струмичката екипа во сезоната што измина го освои и Купот на Македонија, а и покрај збогувањето со репрезентацијата, 26-годишната голманка ќе продолжи да го брани голот на Тиверија Брера.
Со нејзиното повлекување завршува едно значајно поглавје во женскиот репрезентативен фудбал, но зад Викторија Панчурова остануваат 12 години посветеност, гордост и љубов кон дресот на Македонија.
