Големиот успех на младата кикбоксерка Драгица Глигорова, која освои златен медал на Балканското првенство во кикбокс во Нови Сад, Србија, беше повод за прием во oпштина Василево.
Глигорова, која со својот настап се искачи на највисокото место на победничкиот пиедестал на силното балканско натпреварување, уште еднаш покажа дека македонскиот спорт располага со таленти кои со напорна работа, дисциплина и посветеност можат да стигнат до врвни резултати.
Нејзиниот успех претставува голема гордост за Василево и за целиот регион, а признание за постигнатото стигна и од градоначалникот на oпштина Василево, Славе Андонов, кој ја прими младата шампионка и ѝ честиташе за освоеното злато.
„Голема чест и задоволство ми беше денес да ја примам нашата млада и успешна спортистка Драгица Глигорова од Василево, освојувач на златен медал на Балканското првенство во кикбокс кое се одржа во Нови Сад, Србија. Нејзиниот успех е гордост за општина Василево и доказ дека со труд, посветеност и упорност се постигнуваат врвни резултати. Честитки за освоениот медал и посакувам уште многу спортски успеси во иднина“, рече градоначалникот на општина Василево, Славе Андонов.
Освојувањето на балканското злато е уште една потврда за квалитетот и потенцијалот што го поседува Драгица Глигорова, која со своите настапи продолжува достојно да ги претставува Василево и Македонија на меѓународната спортска сцена.
