Младинците на АП Брера го освоија Купот на Македонија, откако во финалето по подобро изведување на пенали ја совладаа екипата на Шкупи. Со овој успех, струмичани ја комплетираа двојната круна сезонава, откако претходно ја освоија и шампионската титула во првенството.
Финалниот натпревар понуди голема борба и неизвесност до самиот крај. Шкупи поведе уште во втората минута преку Судејс Чајани, кој беше прецизен од белата точка за водство од 1:0.
АП Брера успеа да се врати во игра во 40. минута, кога Матеј Сејменов ја затресе мрежата на противникот и израмни на 1:1.
Во второто полувреме иницијативата беше на страната на струмичани. Тие создадоа повеќе можности, а најдобрата не ја искористи Игор Ристов, кој излезе сам пред голманот Сефер Муслиу, но ја погоди стативата.
Сепак, во 75. минута АП Брера стигна до пресврт. Марио Митрев погоди за 2:1 и донесе голема радост кај својот тим. Но, предноста траеше само три минути, бидејќи Нејази Нухија успеа да го совлада Александар Трајков и да израмни на 2:2.
До крајот на регуларниот дел немаше нови голови, па победникот беше решен по изведување на удари од 11 метри.
Во пенал-серијата блескаа двајцата голмани. Александар Трајков одбрани два удари на фудбалерите на Шкупи, додека на спротивната страна Сефер Муслиу исто така забележа две успешни интервенции.
Во решавачките моменти, Трајков повторно беше на висина на задачата и го запре ударот на Нухија, а потоа Бојан Велков беше сигурен од белата точка за големо славје на АП Брера и освојување на куп-трофејот.
Медалите на финалистите и победничкиот пехар им ги врачи претседателот на Фудбалска федерација на Македонија, Масар Омерагиќ.
