Екипата на Ѓорче Петров 2 од следната сезона повторно ќе биде дел од женската Супер лига, откако во бараж натпреварот одигран во Радовиш убедливо славеше над Пелистер со 24:17 и го завери пласманот во елитното друштво.
Младите ракометарки од Скопје уште од самиот почеток покажаа дека се решени да ја остварат целта. По почетното водство од 0:3, тие постојано ја контролираа играта и резултатот, не дозволувајќи му на битолскиот состав да воспостави ритам.
Пелистер успеваше повремено да ја намали негативата, но расположениот напад на Ѓорче Петров 2 секогаш имаше подготвен одговор. Во финишот на првото полувреме скопјанки стигнаа и до седум гола предност, а на паузата заминаа со сигурни 15:9.
Во вториот дел битолчанки се обидоа да се вратат во натпреварот, но проблемите во реализацијата продолжија. Тоа умешно го казнуваше противникот, кој во повеќе наврати ја одржуваше високата предност и не дозволи неизвесна завршница.]
На пет минути пред крајот резултатот беше 23:15 за Ѓорче Петров 2, по што веќе беше јасно дека скопскиот тим е на чекор до Супер лигата, а Пелистер ќе мора да се пресели во Првата женска лига.
Најефикасни во победничкиот состав беа Сара Ристовска, Кристина Наумовска и Тара Аврамовска со по четири погодоци, додека голманките Сара Илиоска и Софи Гошевска заедно собраа девет успешни интервенции. Кај Пелистер најмногу се истакна Атанастасија Тодоровска со шест голови, додека Котевска додаде четири.
Со овој триумф, Ѓорче Петров 2 обезбеди место во Супер лигата за сезоната 2026/27 и ќе им се придружи на Ѓорче Петров, Чаир, Вардар, Куманово, Спартак, Астибо и Атлетик, кој претходно како шампион на Првата лига обезбеди директен пласман во елитата.
За младите „лавици“ ова е круна на успешната сезона, додека Пелистер по поразот во баражот ќе мора да бара нова шанса за враќање меѓу најдобрите од прволигашката конкуренција.
