Македонскиот женски ракометен шампион Ѓорче Петров започна со екипирањето за новата натпреварувачка сезона, во која клубот повторно ќе има високи амбиции на домашната сцена, но и во европските натпреварувања.
Ново име во редовите на „лавиците“ е македонската репрезентативка Ана Марија Коларовска, која по настапите во хрватскиот Брод се враќа во македонскиот ракомет. 23-годишната ракометарка може да игра на сите три бековски позиции и ќе претставува значајно засилување за шампионскиот состав.
Коларовска во својата кариера настапуваше за Спартак, Вардар, Ѓорче Петров и Металург Автокоманда, а периодот поминат во Хрватска беше нејзино прво интернационално искуство. Таа ги помина сите младински репрезентативни селекции на Македонија и денес е дел од сениорскиот национален тим.
Покрај македонската репрезентативка, Ѓорче Петров го договори и ангажманот на младата црногорска репрезентативка Аника Јовановиќ. Станува збор за ракометарка која настапува на позицијата десно крило и доаѓа од редовите на ракометниот гигант Будуќност.
Јовановиќ има 19 години и важи за една од најперспективните ракометарки во Црна Гора. Таа беше дел од кадетската репрезентација на својата земја, а моментално настапува за младинската национална селекција.
Со овие две засилувања, раководството на Ѓорче Петров јасно покажува дека и во новата сезона ќе атакува на највисоките дострели. По освоената двојна круна во Македонија, „лавиците“ ги очекуваат настапи во домашните натпреварувања, Регионалната лига и ЕХФ Европскиот Куп, па затоа навремено започнаа со засилување на играчкиот кадар.
Коларовска носи искуство и репрезентативен квалитет, додека Јовановиќ пристигнува како голем талент од школата на Будуќност, што е јасен показател дека шампионот сериозно ги гради темелите за уште една успешна сезона.
