Македонската репрезентација претрпе убедлив пораз од Турција со 4-0 (2-0) на контролниот натпревар одигран во Истанбул. Избраниците на Гоце Седлоски не успеаја да парираат на расположениот домаќин, кој ја оправда фаворитската улога и заслужено стигна до победата.
По средбата, селекторот Гоце Седлоски ја презеде одговорноста за резултатот, нагласувајќи дека ваквите натпревари се значајни за стекнување искуство и подобрување на играта на националниот тим.
„Честитки до Турција за заслужената победа. Станува збор за квалитетна репрезентација со голем број врвни фудбалери. Одговорноста за поразот е моја, бидејќи јас ги носам одлуките и го составувам тимот. Им дадов шанса на сите играчи да добијат минутажа и токму од ваквите натпревари треба да извлечеме важни поуки.
Свесни сме дека веќе четири натпревари не сме постигнале погодок и тоа е сегмент на кој ќе мора дополнително да работиме. Се соочивме со исклучително силни противници и секоја наша грешка беше строго казнета. Потребно е детално да ги анализираме слабостите и да спречиме нивно повторување во иднина.
Во процес сме на создавање нов тим, а за дел од фудбалерите ова беше драгоцено меѓународно искуство. Очекувам секој што ќе добие повик во репрезентацијата да го даде максимумот и да ја оправда довербата. Имам јасна претстава за потенцијалот на секој играч, а во периодот што следува ќе работиме на корекција на недостатоците и подобра подготовка за предизвиците што нè очекуваат“, изјави Седлоски.
Следен сериозен предизвик за Македонија ќе биде настапот во Лига Б од Лигата на нациите. Контролните дуели против Босна и Херцеговина и Турција беа корисна проверка на моменталната подготвеност на националниот тим, особено ако се земе предвид дека во групната фаза ќе се соочи со селекциите на Швајцарија, Шкотска и Словенија.
