Македонскиот ракомет доби уште еден европски шампион. ГРК Охрид го освои трофејот во ЕХФ Европскиот Куп, откако во реваншот од големото финале на домашен терен ја совлада Татабања со 31-25 и со две победи во финалната серија заслужено се искачи на европскиот врв.
Во преполната сала „Билјанини Извори“, избраниците на Борис Ројевиќ покажаа карактер, квалитет и шампионски менталитет. По минималната предност стекната на првиот натпревар во Унгарија, охриѓани не калкулираа пред својата публика, туку одиграа уште еден меч на високо ниво и на најдобар можен начин ја заокружија сезоната од соништата.
Во салата атмосферата беше неверојатна, а пред самата сала имаше видео бим каде се следеше финалето, за сите оние навивачи за кои немаше место во салата.
Натпреварот започна во израмнет ритам, со неколку одлични интервенции на Кристијан Пилиповиќ, кој уште од стартот внесе сигурност во одбраната на домашниот тим. Охрид успеа прв да наметне свое темпо и во неколку наврати создаде солидна предност, но унгарскиот состав не дозволуваше лесно одлепување на резултатот.
Дополнителен предизвик за домаќините беше директниот црвен картон на Анте Иванковиќ во првото полувреме, по што Татабања успеа да се врати во игра и дури накратко да ја преземе иницијативата. Сепак, охриѓани останаа смирени и на паузата заминаа со минимална предност од 12-11.
Клучниот момент се случи на почетокот на вториот дел. Охрид влезе фуриозно, одигра неколку одлични минути во нападот и брзо ја зголеми разликата на пет гола. Токму тогаш се почувствува дека трофејот е сè поблиску до брегот на Охридското Езеро.
Иако Татабања во неколку наврати се обиде да ја врати неизвесноста, македонскиот претставник секогаш имаше подготвен одговор. Јасухира беше лидер во нападот, Јагуриновски постигна важни голови во пресудните моменти, а Пилиповиќ продолжи да ги фрустрира противничките ракометари со своите одбрани.
Во завршницата веќе беше јасно дека европската титула останува во Македонија. Последните минути минаа во атмосфера на славје, а по последниот судиски свиреж започна големата прослава на историскиот успех.
Најефикасен во редовите на Охрид беше Јасухира со девет погодоци, додека Јагуриновски и Стрмљан дадоа значаен придонес во нападот. На голот повторно блесна Пилиповиќ со 13 успешни интервенции.
За Охрид ова е убедливо најголемиот успех во клупската историја, а за македонскиот ракомет уште една потврда дека домашните клубови можат рамноправно да се носат со европските екипи. По минатогодишниот триумф на Алкалоид, трофејот во ЕХФ Европскиот Куп и оваа сезона останува во Македонија, но сега негов нов дом е Охрид.
