Кадетите на Водно Санс обезбедија пласман во големото финале на завршниот турнир од М16 лигата во машка конкуренција, откако во полуфиналето убедливо го совладаа Феникс 2010 со 92:71.
Избраниците на тренерот Митко Маринковски имаа контрола врз резултатот во текот на целиот натпревар. По првото полувреме Водно Санс имаше предност од 45:38, но клучниот момент се случи во третата четвртина кога направи вистинска доминација и разликата ја зголеми на недостижни 73:47.
Токму тој одличен период од играта се покажа како пресуден за сигурен триумф и место во финалето на сезоната.
Голем придонес во победата даде триото Муратовски – Стаменковски – Веселинов, кое заедно постигна 49 поени и беше главен двигател на офанзивната игра на Водно Санс.
Кај Феникс 2010, најефикасен беше Филипче со 20 поени и шест скока, Јангелов запиша 13 поени и шест асистенции, Јајага постигна 11 поени, додека Гајовиќ натпреварот го заврши со 10 поени.
Во првото полуфинале, Вардар беше подобар од Работнички со 78:58, со што беа комплетирани финалните двојки на завршниот турнир.
Вечерва во спортската сала „Лазар Лечиќ“ во Скопје ќе се одиграат натпреварите за конечен пласман. Од 18:00 часот Работнички и Феникс 2010 ќе се борат за третото место, додека големото финале меѓу Вардар и Водно Санс е закажано за 20:30 часот.
Љубителите на младинската кошарка вечерва ќе имаат можност да проследат интересна битка за шампионскиот трофеј во М16 лигата, во која силите ќе ги одмерат двете најдобри екипи сезонава – Вардар и Водно Санс.
