ГРК Охрид е на само еден натпревар од испишување историја, откако во првиот финален меч од ЕХФ Европскиот Куп успеа да слави на гостувањето кај МОЛ Татабања во Унгарија.
Пред реваншот во преполната „Билјанини Извори“, во изјава за Спортска Мрежа, голманот на охриѓани- Бојан Блажески порача дека тимот има причина да жали што не обезбедил и поубедлива предност од Унгарија, но дека сега целиот фокус е насочен кон решавачките 60 минути во Охрид.
„Одигравме фантастично прво полувреме. Водевме со седум голови во еден момент, но победивме со еден. Има за што да жалиме, но сето тоа е зад нас. Јас сметам дека доколку критериумите на судиските одлуки во вториот дел, беа исти како во првото полувреме, сигурен сум дека ќе имавме поголема разлика.“- изјави Блажески за Спортска Мрежа.
Исто така, тој истакна дека одбраната, агресивноста и огромната желба се најсилните адути на Охрид сезонава и верува дека токму тие ќе бидат пресудни и во реваншот.
„Сега сме фокусирани само на недела. Одбраната ќе биде клуч за европскиот пехар, нè краси цела година, како и агресивноста, борбата и желбата. Така ќе биде и во недела- ќе дадеме сè од себе да се радуваме сите заедно и да ја паметиме оваа неверојатна сезона со Титула. ,,Билјанини Извори” се распродаде за 15 минути и ги повикувам сите присутни да ни дадат ‘ветер во грб’.”
Голманот испрати и порака до навивачите, нагласувајќи дека поддршката од трибините може да биде клучна во битката за европскиот трофеј.
,, Вие сте дел од тимот и во ова финале ни е потребна огромна поддршка. Сите заедно за Охрид, за Македонија, поддржете нè во обидот да испишеме историја!”- заврши Блажески.
Реванш- финалето меѓу ГРК Охрид и МОЛ Татабања ќе се игра в недела од 20:00 часот, во атмосфера која веќе се најавува како една од највозбудливите во македонскиот ракомет оваа сезона.
