Ракометарите на Радовиш со победа се простија од суперлигашкото друштво, откако во последното коло од плеј-аут фазата славеа против Струга со 32-29, а натпреварот имаше и силна емотивна нота — легендарниот голман Славјан Паунов го одигра последниот меч во својата богата професионална кариера.
Радовишани, кои и покрај испаѓањето во понизок ранг, не дозволија сезоната да ја завршат без победа, пред својата публика стигнаа до единствениот триумф сезонава. Струга настапи во комбиниран состав, со мислите насочени кон баражот за опстанок против Младост Богданци, а домаќините тоа знаеја да го искористат.
Најефикасен кај Радовиш беше Филип Костадинов со девет погодоци, додека Илија Димов постигна пет. Кај стружани се издвоија Наум Костов со осум и Бобан Савевски со шест голови.
Но, резултатот овојпат беше во втор план. Сите погледи беа вперени кон Славјан Паунов — популарниот Цаци, човекот кој со години беше симбол на Радовиш, борец, лидер и миленик на публиката.
На 45-годишна возраст, искусниот голман реши да стави крај на кариерата во која остави длабока трага во македонскиот ракомет. Паунов, кој потекнува од Кочани, во неколку наврати беше дел од Радовиш и практично овој град стана негов втор дом. Секогаш кога било најтешко, кога клубот се борел за опстанок, бодови и достоинство, Цаци бил тука — со своите одбрани, искуство и огромно срце.
Во текот на кариерата настапуваше и за Борец ФЛ, Овче Поле и Тиквеш, а со екипите од Свети Николе и Кавадарци играше и на европската сцена во Челинџ Купот.
И оваа сезона Паунов покажа дека класата е вечна. На 45 години бранеше како во најдобрите денови, потврдувајќи зошто ужива огромна почит кај радовишката спортска јавност и кај верната навивачка група „Лебари“.
Со последниот судиски свиреж заврши една голема кариера, а Радовиш и македонскиот ракомет испратија искрен аплауз за човекот кој остави неизбришлива трага меѓу стативите.
Цаци мајсторе, благодариме за сè. Македонскиот ракомет е горд што имаше професионалец како тебе. Од редакцијата на Спортска Мрежа ти посакуваме убави „пензионерски“ денови, има што уште да му даде на македонскиот ракомет, но сега во поинаква улога, те чекаме пак во сала.
