Шампионот на Македонија, РК Вардар, со победа ја затвори сезоната во Супер Лигата, откако во последното коло славеше против РК Бутел Скопје со 36-34. Иако „црвено-црните“ веќе ја имаа обезбедено титулата, гостите одиграа храбар натпревар и долго време беа рамноправен ривал во „Јане Сандански“.
Средбата првично требаше да се одигра на теренот на Бутел, но скопскиот тим му излезе во пресрет на Вардар, кој сакаше токму пред својата публика да ги подигне шампионскиот пехар и медалите. Така, по крајот на мечот следуваше и свеченото доделување на трофејот, кој по 17. пат ќе ги краси витрините на најтрофејниот македонски клуб.
Бутел имаше одлично прво полувреме и на паузата замина со предност од 19-17, а и во продолжението знаеше да го одржува водството. Најголем дел од натпреварот гостите беа чекор пред фаворитот, кој тешко успеваше да најде ритам и вистинска мотивација во последниот сезонски дуел.
Сепак, искуството и поширокиот ростер на Вардар дојдоа до израз во финишот. Во последните петнаесетина минути домашните уфрлија во повисока брзина и од негатива од 29-30 направија серија за пресврт и водство од 32-30, а потоа и 34-31, со што практично го решија победникот на шест минути пред крајот.
За „црвено-црните“ ова беше 30. победа сезонава во шампионатот, со вкупно освоени 60 бода и дури 1057 постигнати голови.
Натпреварот имаше и емотивен карактер, бидејќи последен пат во дресот на Вардар настапија Мигуел Пинто, Харуки Кавада, Марек Марчинијак, Марио Танкоски и Николас Боно. Од клубот заминуваат и Кристијан Стаменковиќ, Мигуел Еспиња и Дмитро Горига, иако не беа дел од составот за овој меч.
Најефикасни кај Вардар беа Урош Митровиќ и Харуки Кавада со по шест погодоци, додека кај Бутел се истакнаа Дејан Михајловиќ и Тодор Узунчев со по осум гола.
