По пауза поради повреда, Јован Манев повторно е дел од македонската репрезентација, која ги продолжува подготовките за контролните натпревари против Босна и Херцеговина во Сараево и Турција во Истанбул.
Дефанзивецот на ФК Нови Пазар истакна дека е среќен што повторно е во националниот тим и нагласи дека секогаш е чест да се носи дресот на Македонија.
„Нè очекуваат натпревари против квалитетни репрезентации како Босна и Херцеговина и Турција. Подготвени сме да го дадеме максимумот, без разлика дали станува збор за пријателски натпревар или натпревар за бодови. Такви поделби не постојат кога се игра за репрезентацијата, затоа што секој натпревар е исклучително важен“, изјави Манев.
Македонскиот репрезентативец потенцираше дека квалитетот на противниците е дополнителен мотив за добар настап.
„Уверен сум дека сите ќе го дадеме максимумот на овие два натпревари и се надевам на победи. Самото тоа што БиХ и Турција се квалификуваа на Светско првенство покажува дека станува збор за репрезентации со голем квалитет, но тоа нема да значи ништо ако ние бидеме на вистинското ниво и го дадеме максимумот на теренот. Им честитаме за пласманот на Светското првенство, но ние одиме таму да дадеме сто проценти и да победиме“, рече Манев.
Во пресрет на натпреварите, Манев нагласи дека најважно ќе биде фудбалерите да ги исполнат задачите кои ќе бидат дадени од страна на селекторот.
„Селекторот ќе го има главниот збор, а наше е да ги испочитуваме неговите барања, да ги реализираме задачите што ќе ни ги постави и да дадеме сè од себе за да оствариме победа“, додаде македонскиот дефанзивец.
