Македонскиот одбојкарски судија Александар Цеков успешно го заврши курсот за кандидати за интернационални судии, организиран од Европска одбојкарска конфедерација, и стана дел од друштвото на арбитри кои ја носат значката на ЦЕВ.
Курсот се одржа во Виши, Франција, во периодот од 17 до 24 мај, а Цеков беше еден од 26-те кандидати од 24 европски земји. Македонскиот судија со високи оценки ја мина комплетната обука, која опфати теоретски и практичен дел.
Во рамки на програмата, кандидатите судеа на вкупно 44 натпревари од високоелитното национално првенство на Франција за играчи до 22 години.
Во моментов, Цеков има статус на кандидат за интернационален ЦЕВ судија. За да го добие и официјално статусот интернационален судија, потребно е да добие три позитивни потписи од ЦЕВ судиски супервизори на меѓународните натпревари на кои ќе биде делегиран од септември оваа година.
Македонски судии кои ја носат значката на ЦЕВ се Влатко Ристовски, Орданче Амбарков, Јосип Христов и Елеонора Петровска, додека Симон Џинес, Никола Мицевски, Здравко Здравески и Славчо Здравески се меѓународни делегати.
