Македонската А репрезентација денеска ги продолжува подготовките за претстојните контролни натпревари против Босна и Херцеговина на 29 мај во Сараево и против Турција на 1 јуни во Истанбул. Избраниците на селекторот Гоце Седлоски вечерва од 19:00 часот ќе го одржат тренингот во комплетен состав, откако на подготовките ќе им се приклучат Елиф Елмас и Агон Елези.
Фудбалерот на данскиот Сондерјиске, Сефер Емини, е еден од играчите кои со нетрпение го очекуваат својот можен дебитантски настап во дресот на македонската репрезентација.
„Сите сега одат на одмор, а ние сме тука со репрезентацијата и максимално ќе се подготвиме за овие два натпревари. Има многу нови играчи, јас сум еден од нив и сè уште немам деби. Ќе се подготвиме добро. И Босна и Турција ќе играат на Светско првенство, затоа мора многу сериозно да ги сфатиме двата натпревари. Тоа ќе ни биде добра подготовка за периодот што следува. Технички и тактички треба да бидеме дисциплинирани и физички на терен да го исполниме тоа што ќе го бара стручниот штаб. Верувам дека сè ќе биде во ред“, изјави Емини.
