Македонските таеквондисти продолжуваат со одличните настапи на меѓународната сцена. Нов голем успех оствари Филип Блажевски од ТК Бутел, кој на престижниот турнир LUX OPEN 2026 во Луксембург стигна до златниот медал во категоријата до 80 килограми.
Филип на патот до златото ги совлада противниците од Норвешка, Велика Британија, Германија и Грција, прикажувајќи одлични борби и сигурни настапи. Со четири убедливи победи, Блажевски уште еднаш ја потврди својата одлична форма и квалитет во силна меѓународна конкуренција.
Турнирот LUX OPEN важи за еден од поквалитетните европски таеквондо настани, со учество на натпреварувачи од голем број држави. Блажевски минатата година освои европска бронза во У21 конкуренција и важи за еден од најголемите македонски олимписки надежи.
Уште еден одличен резултат за Македонија оствари и Милијана Релиќ, која повторно се искачи на победничкиот пиедестал освојувајќи сребрен медал.
Релиќ до финалето стигна со три сигурни и убедливи победи, откако успеа да ги совлада двете противнички од Германија, како и една натпреварувачка од Луксембург. Во борбата за златото беше поразена од Бразилката Санди Македо, но и покрај тоа уште еднаш потврди дека е меѓу најдобрите македонски таеквондистки во моментов.
Со новите медали, македонските таеквондисти продолжуваат успешно да ја претставуваат државата на меѓународните турнири и да најавуваат уште поголеми успеси во иднина.
