Екипата на Истатов на спортски и достоинствен начин го поздрави новиот шампион Скопје, откако пред почетокот на натпреварот приреди шпалир за шампионките во рамки на претпоследното коло од Прва женска фудбалска лига.
По убавиот гест, „истатовки“ одиграа квалитетен натпревар и забележаа победа од 2-1. Домаќинот поведе уште во 15. минута преку Миа Головска, додека Канита Емини пред крајот на првото полувреме зголеми на 2-0.
Во второто полувреме шампионките се обидоа да се вратат резултатски во мечот, а конечните 2-1 беа поставени во 89. минута кога Тамара Атанасовска ја затресе мрежата на Истатов.
Со оваа победа, Истатов ја завршува сезоната на одличното трето место на табелата. Стратегот Кирил Изов во кратка изјава за Спортска Мрежа истакна дека тимот зад себе има успешна сезона и дека сите во клубот се среќни и задоволни од остварениот пласман.
Новиот шампион Скопје, пак, по освоената титула ќе се насочи кон подготовките за квалификациите за Лигата на шампионите.
Во последното коло Истатов ќе игра против Вардар, а пак Скопје ќе ја пречека второпласираната Тиверија Брера.
