Брера Струмица има генерација за гордост! Младинскиот тим на струмичани зад себе остави неверојатна сезона и сосема заслужено ја освои шампионската титула, без ниту еден пораз во текот на целиот шампионат.
Тимот предводен од стратегот Ѓорги Стојчев доминираше во младинската конкуренција и покажа карактер, квалитет и победнички менталитет во текот на целата сезона. Брера Струмица шампионскиот пехар го освои со фантастичен биланс од 29 победи и само едно реми, без ниту еден загубен натпревар.
Бројките доволно зборуваат за доминацијата на струмичани сезонава. Младинците на Брера постигнаа неверојатни 164 голови, а примија само 16, што е уште една потврда дека оваа генерација едноставно немаше конкуренција на домашната сцена.
Со освоената титула, младите фудбалери на Брера Струмица обезбедија и настап во младинската Лига на шампиони, а клубот останува во игра и за освојување на двојната круна оваа сезона.
Во Струмица со право се горди на оваа генерација, која многумина веќе ја гледаат како иднина не само на клубот, туку и на македонскиот фудбал и македонската репрезентација. Станува збор за талентирана и моќна генерација која со своите игри го привлече вниманието на спортската јавност.
Од Брера Струмица истакнуваат дека овој успех е резултат на голема работа, посветеност и тимска атмосфера во целиот клуб.
Шампионскиот пехар на Брера Струмица го додели членот на Управниот одбор на ФФМ, Станко Манчевски.
Во наредниот период, на Спортска Мрежа ќе биде реализирана и специјална спортска емисија посветена на младинските погони на Брера Струмица и талентите кои доаѓаат од клубот.
