Екипата на Силекс е освојувач на Купот на Македонија за сезоната 2025/26, откако во големото финале на Националната арена „Тодор Проески“ во Скопје славеше минимална победа од 1:0 против Шкендија.
Кратовци така стигнаа до четвртата Куп титула во својата историја и се израмнија со Работнички на вечната листа по бројот на освоени трофеи во ова натпреварување.
Финалето понуди цврст и борбен фудбал со многу тактичко надмудрување и мал број вистински шанси. Силекс подобро го отвори мечот и уште на стартот се закани преку Пиреш, додека Шкендија најопасна беше преку Нзенгуе и Красниќи, но сигурен на голот беше Џеков.
Во второто полувреме играта стана подинамична, а тетовци во 64. минута беа блиску до погодок, кога Џеков со фантастична интервенција го запре ударот на Красниќи и го сочува својот гол.
Клучниот момент на натпреварот се случи во 71. минута. По грешка на средината од теренот на Шкендија, Додев одлично повлече контранапад и несебично го проигра Алиќ, кој од непосредна близина ја затресе мрежата за големо славје на Силекс.
До крајот Шкендија се обидуваше да се врати резултатски, но избраниците на Горазд Михајлов и Александар Васоски одиграа дисциплинирано во одбраната и не дозволија изненадувања.
Со освојувањето на Купот, Силекс обезбеди и настап во квалификациите за Конференциската лига, па Кратово повторно ќе гледа европски фудбал.
Историски гледано – Силекс има Куп титула од 1994, 1997, 2021 и сега 2026 година, а пак во финалињата во 1995 и 2022 година беше поразен.
