Бранителот на титулата, МЗТ Скопје Аеродром, со победа ја отвори финалната серија во домашниот шампионат, откако во првиот натпревар од плејофот славеше против Маџари со 84:77 во СЦ „Јане Сандански“.
Дебитантот во елитното друштво покажа дека заслужено стигнал до финалето и во поголем дел од првото полувреме имаше контрола над резултатот. Гостите поведоа и со највисоки плус девет (33:24), а имаа и предност од седум поени (35:28), пред домаќинот да одговори со серија од 17:3 и целосно да го сврти текот на мечот. На паузата, аеродромци заминаа со водство од 45:40.
Во третата четвртина Маџари повторно се доближи, намалувајќи на само два поени негатива (54:56), но искуството на МЗТ повторно дојде до израз. До крајот на периодот шампионот повторно се одлепи на 69:61, а по тројката на МекКејден на стартот од последната четвртина, предноста стана и двоцифрена (72:61), што домаќините успешно ја зачуваа до самиот крај.
Најефикасен кај „металците“ беше Маслинко со 17 поени и три скока. Танасковиќ додаде 15 поени и седум скока, додека МекКејден и Дамјан Стојановски постигнаа 14, односно 12 поени.
Кај Маџари, Луис одигра одличен натпревар и запиша 27 поени, осум скока и три асистенции, додека Армстронг натпреварот го заврши со 19 поени, осум скока и осум асистенции.
Вториот финален натпревар ќе се игра во среда од 18 часот, повторно во СЦ „Јане Сандански“, а шампионската титула ќе ја освои екипата која прва ќе стигне до три победи во серијата.
