Македонските таеквондисти имаа успешен настап на силниот меѓународен Астерикс Куп – Е3 турнир во Србија, каде што во конкуренција на повеќе од 1.400 натпреварувачи од целиот свет успеаја да освојат четири медали и да остават одличен впечаток.
Станува збор за еден од поквалитетните турнири во олимписко таеквондо во регионот, на кој учествуваат врвни натпреварувачи од повеќе држави, а македонските претставници повторно покажаа дека можат рамноправно да се носат со силната меѓународна конкуренција.
Најголемиот успех го оствари Теодор Стојановски од ТКД Бутел, кој во јуниорска конкуренција до 63 килограми стигна до златниот медал. Со овој триумф Стојановски освои и нови 30 поени за европската ранг-листа, што претставува дополнителен мотив и значаен чекор во неговиот понатамошен развој и настапи на меѓународната сцена.
Одличен резултат забележа и Душица Бреслиева од ТКД Штип, која во категоријата јуниорки до 55 килограми се закити со сребрен медал по серија добри борби и сигурни настапи низ турнирот.
До бронзени медали стигнаа и Ведрана Тунески од ТКД Бутел во категоријата кадетки до 51 килограм, како и Филип Симоновски од ТК Младост кај кадети до 57 килограми. Двајцата со своите настапи покажаа квалитет и голем потенцијал за идни успеси.
Освоените медали се уште една потврда за напредокот на македонското таеквондо и за континуираната работа на клубовите и натпреварувачите, кои сè почесто бележат забележителни резултати на големите меѓународни турнири.
