Фудбалскиот клуб Кадица 1965 ја освои шампионската титула во Општинската фудбалска лига – Прилеп, откако во драматичното финале славеше против Стрела 21 со резултат 3:2.
Во возбудлив натпревар исполнет со борба и неизвесност, Кадица 1965 успеа да стигне до големиот трофеј и со тоа обезбеди право следната сезона да се натпреварува во Третата македонска фудбалска лига.
По завршувањето на финалето, шампионскиот пехар на новиот првак му го додели секретарот на Општинскиот фудбалски сојуз Прилеп, Петар Илиоски.
Главен судија на финалниот натпревар беше Кирил Смоквоски, додека негови асистенти беа Борис Трајков и Дино Конески. Улогата на контролор и делегат на средбата ја извршуваше Горан Спиркоски.
Со ова официјално беше спуштена завесата на сезоната 2025/2026 во Општинската фудбалска лига во Прилеп.
Претходно, како што објави Спортска Мрежа, екипата на Прилеп Сити обезбеди промоција од Б во А Општинска лига, па прилепскиот аматерски фудбал добива уште една интересна сезона со нови предизвици и промени.
