Дисциплинската комисија при Фудбалска федерација на Македонија донесе повеќе казни и покрена дисциплински постапки по натпреварите од домашните фудбалски шампионати.
Најстрого е санкциониран Махир Ајрули од ФК Шкендија Арачиново 77, кој доби суспензија од пет натпревари. Роналдо Вебстер од ФК Шкендија и Илија Апостоловски од ГФК Вардар Неготино се казнети со по три натпревари неиграње.
По еден натпревар суспензија добија Дино Михолов и Лука Бојаџиев од ФК Брегалница 2008, како и Арсим Љамалари и Иљаз Чилафи од ФК Шкендија Арачиново 77. Со еден меч пауза се санкционирани и Дамјан Серафимов од ГФК Охрид и Егзон Белица од ФК Работнички.
Дисциплинската комисија изрече и функционерски казни. Влатко Костов, шеф на стручниот штаб на ФК Брегалница 2008, како и Шабан Сулиман, тренер на ФК Работнички, добија забрана за вршење функција во траење од еден месец. Иста санкција му е изречена и на Исуфи Авдираман, комесар за безбедност на ФК Шкендија Арачиново 77.
Воедно, поведени се дисциплински постапки против ФК Вардар поради употреба на пиротехнички средства на дуелот со ФК Силекс, како и против ФК Шкендија поради недолично скандирање на натпреварот со ФК Струга Трим Лум.
Постапки се поведени и против ФК Брегалница 2008 поради слаба организација на мечот против ФК Шкендија Арачиново 77, како и против клубот од Арачиново поради употреба на пиротехнички средства и влегување член на управата на теренот.
