Само во Трета лига – Исток се чека потврда на шампионот, а со тоа да се добие и последниот патник во баражот за Втора лига.
Двете екипи во трка за првото место во третолигашкото друштво на Истокот, Победа Валандово или Овче Поле, кој ќе биде шампион?
Само еден бод е разликата меѓу „калинкарите“ и „овчарите“, тимот од Валандово е прв со 38 бодови, а пак тимот од Свети Николе е втор со 37 бодови.
- Што вели распоредот – кој тим има поголеми шанси да направи „кикс“?
20 коло
Овче Поле – Дојранско Езеро
Победа Валандово – Тиверија
21 коло
Хоризонт Турново – Овче Поле
Карбинци – Победа Валандово
22 коло
Овче Поле – Малеш
Победа Валандово – Брегалница Делчево
Според распоредот на три кола до крајот Овче Поле има најтежок предизвик на стадионот „Кукуш“ каде треба да се соочи со некогашниот вицешампион на Македонија, Хоризонт Турново. Тимот од Свети Николе не би требало да има проблем на домашен терен против Дојранско Езеро и Малеш каде ќе важи за голем фаворит за трите бодови.
Екипата на Победа Валандово ќе има можеби за нијанса потешки натпревари, на домашен терен не би требало да има проблем да се добие Тиверија, а ако се земе фактот што „калинкарите“ на првото соочување со струмичани во гости славеа убедливо, сега би требало да ги потврдат трите бодови со сигурна победа.
Следува едно незгодно гостување кај Карбинци, но овој тим не е на нивото од минатата сезона, но сепак важи за екипа која знае да ги добива натпреварите со фаворитите, па тоа ќе биде предизвик за „калинкарите“.
На домашен терен Победа Валандово ќе решава со Брегалница Делчево, меч кој доколку се добие ќе биде шампион и ќе игра бараж за влез во Втора лига, но тимот од Делчево се покажа незгоден и извлече бод со Хоризонт Турново, но кој натпревар Брегалница подоцна го загуби службено.
Можеби последното коло и нема да решава, ако Овче Поле направи „кикс“ во претпоследното коло кај Хоризонт Турново.
Ако двете екипи бидат перфектни до крај и ги освојат деветте бодови кои се во игра, тогаш Победа Валандово ќе биде шампион и ќе игра бараж за Втора лига.
