Дербито на 28. коло на Втора лига во Штип меѓу Брегалница и Шкендија Арачиново заврши без победник (1:1) за делба на бодовите, резултат кој Брегалница ја остава на првото место и на милиметри од Прва лига.
Николче Шаркоски го отвори резултатот во првиот дел за 0:1, а во вториот дел со гол од пенал Костадин Капсаров ги постави конечните 1:1 и големо славје во Штип.
Голема радост и славје за верната “фаланга” и цела штипска спортска јавност.
Во Македонска Каменица се одигра дерби за престиж без резултатско значење меѓу Каменица Саса и Слога Виница, каде само еден гол беше доволен за славје на домаќините од 1:0. Стрелец на победничкиот гол беше Спенџарски.
Кожуф како голем фаворит на домашен терен лесно славеше против Победа со резултат од 8:0.
Во големата голеада стрелаа Лембовски двапати, а по еднаш Шефити, Тодороски, Љушев, Петров, Ислами и Попов.
Неизвесно дерби за петтото место имаше меѓу Новаци и Беласица, каде голот на Стефан Јовановски беше доволен за славје на домаќините од 1:0.
Фаворитот Охрид без проблеми го доби „фенерџијата“ Големо Коњари на домашен терен со резултат од 3:0 Овде прашање беше само резултатската разлика. Стрелци беа Димитриј Димитриевски Димитриј, Виктор Наумовски и Стојан Попоски.
Во Ресен тимот на Детонит Плачковица од Радовиш како фаворит ги освои бодовите против Преспа славејќи со 0:3 преку головите на Дуков за 0:1 на полувреме и Мичковски и Спасиќ за конечни 0:3.
Вреди да се истакне одбранетиот пенал на Димитар Ѓоргиев, откако Нико Пластиновски не реализира од белата точка.
Тетекс на домашен терен немаше сили за Скопје и загуби со минимален резултат од 0:1 благодарение на голот на Рамадани.
Осогово го освои Неготино откако со резултат од 0:4 славеше над отпишаниот Вардар.
Хет-трик имаше Филип Димов, а еден гол беше дело на Драган Паунов.
Брегалница е прва со 65 бода, колку што има и Скопје кој е втор, но “сините” имаат подобар меѓусебен дуел од “пиратите”. Шкендија Арачиново е трета со 63 бода, Охрид е четврт со 62 бода.
