Брегалница денеска ја очекува едно од најважните гостувања сезонава, откако во рамки на претпоследното 29. коло од Втората македонска фудбалска лига ќе се соочи со Осогово во Кочани.
За „сините“ од Штип победата е единствена опција во битката за шампионската титула и пласман во Првата лига. Со евентуален триумф, Брегалница ќе го задржи првото место на табелата, а потоа во последното коло против Победа во Штип ќе има можност пред својата публика да го потврди враќањето во елитата.
Од таборот на Брегалница информираа дека за денешниот натпревар е организиран превоз за сите навивачи и симпатизери кои сакаат да му дадат поддршка на клубот. Превозот е организиран од верните навивачки групи „Фаланга“ и „Ултра Банда“.
Поаѓањето е закажано за 15:00 часот пред Нова Пошта во Штип, а од клубот упатија повик за масовна поддршка и фер навивање.
„Ги известуваме сите симпатизери и љубители на клубот кои сакаат да дадат поддршка, дека за денешниот натпревар во Кочани е организиран превоз. Истиот е организиран од нашите верни навивачки групи Фаланга и Ултра Банда. Воедно апелираме за достојно и културно навивање за нашата плаво-бела гордост. Да се собереме во голем број и сплотено да покажеме како се сака клубот“, порачаа од Брегалница.
Натпреварот меѓу Осогово и Брегалница се игра денеска на Градскиот стадион во Кочани, а се очекува трибините да бидат исполнети со голем број навивачи од двата табора.
